Vantar yfir 100 milljarða

Útlánasafn Íbúðalánasjóðs er líklega ofmetið um miklu hærri upphæðir en áætlun IFS greiningar og starfshóps stjórnvalda um stöðu og horfur sjóðsins gerði ráð fyrir.

Eignatjón Íbúðalánasjóðs gæti numið á bilinu 86-129 milljörðum króna, að því er fram kemur í greiningu sérfræðinga á fjármálamarkaði sem Morgunblaðið hefur undir höndum. Niðurstöður IFS og starfshópsins, sem voru birtar í lok síðasta árs, sögðu að útlánasafn sjóðsins væri ofmetið um 40 milljarða.

Í umfjöllun um mál þetta í Morgunblaðinu í dag kemur fram, að reynist greining sérfræðinganna rétt, en hún hefur verið kynnt á fundum hjá fjölmörgum fjármálastofnunum á síðustu vikum, er ljóst að ríkissjóður þyrfti að leggja sjóðnum til meira en 100 milljarða á næstu árum til viðbótar við þá 13 milljarða sem stjórnvöld samþykktu að veita honum í árslok 2012. Ríkið þurfti ennfremur að leggja Íbúðalánasjóði til 33 milljarða á árinu 2011.