Földu tap sem nam landsframleiðslu Íslands

Þýski stórbankinn Deutsche Bank faldi rúmlega 1500 milljarða tap sitt á árunum 2006 til 2009 til að komast hjá neyðaraðstoð frá stjórnvöldum. Þetta kemur fram í Financial Times, en þar er sagt að þýski seðlabankinn sé með rannsókn í gangi til að skoða ásakanirnar.

Deutsche bank hefur neitað ásökunum og að þær hefðu fyrst verið settar fram fyrir tveimur og hálfu ári. Þá hafi málið verið rannsakað án þess að neitt saknæmt hafi komið í ljós.

Þrír starfsmenn bankans tilkynntu eftirlitsstofnun um meint misferli, en þeir sögðu að miðlarar, með vitneskju yfirmanna, hafi reynt að fela tap á skuldabréfamarkaði meðan mestu hremmingarnar skuldakreppunnar gengu yfir. 

Meðal þeirra sem létu vita af athæfinu voru yfirmaður á verðbréfasviði og stjórnandi í áhættustýringu. 

Ef tapið hefði verið réttilega skráð hefði það verið metið á 4 milljarða Bandaríkjadollara í bókum bankans, en hefði jafnvel getað náð upp í 12 milljarða dala. Það jafngildir um 500 til 1500 milljörðum íslenskra króna. Til samanburðar má geta að landsframleiðsla Íslands er rúmlega 1700 milljarðar.

• 1 blogg um fréttina

Bloggað um fréttina

• Jenný Stefanía Jensdóttir: Einbeitt og viðvarandi tortryggni - aðskilnaður fjárfestingabanka og viðskiptabanka.