Laun forstjóra lækkuð um 50%

Laun forstjóra og stjórnarformanns tæknirisans Panasonic verða lækkuð um 50%. Er þetta gert til að sýna fram á að þeir beri ábyrgð á slæmu gengi fyrirtækisins.

Forstjórinn Kazuhiro Tsuga og stjórnarformaðurinn Fumio Ohtsubo hafa endurgreitt um 40% launa sinna í hverjum mánuði frá því í nóvember. Það hafa þeir valið sjálfir að gera. Aðrir stjórnendur fyrirtækisins hafa endurgreitt um 20% launa sinna, segir talsmaður fyrirtækisins.

En í júlí verður þessi launalækkun skjalfest og opinber. Það gildir um alla stjórnendur fyrirtækisins en lækkunin verður mismikil þó.

Tæknigeirinn í Japan hefur þurft að þola mikinn samdrátt undanfarna mánuði. Verð hefur lækkað og samkeppni á alþjóðamarkaði aukist.

Panasonic gerir ráð fyrir miklu tapi á fyrsta ársfjórðungi ársins. Fyrirtækið er í viðræðum við stéttarfélög um almenna launalækkun hjá öllum starfsmönnum fyrirtækisins.

• 1 blogg um fréttina

Bloggað um fréttina

• Sigurður Haraldsson: 50%?