Jón von Tetzchner, fjárfestir og stofnandi norska hugbúnaðarfyrirtækisins Opera Software, kom með 725 milljónir til landsins í byrjun maí í gegnum fjárfestingarleið Seðlabankans.
Morgunblaðið sagði frá því í apríl að hann hefði samtals komið með um tvo milljarða til landsins. Fjárhæðin sem hann hefur komið með til landsins nemur því hátt í þremur milljörðum króna. Hann hefur farið fjárfestingarleiðina sjö sinnum en hún veitir 20% afslátt af krónukaupum sé fjárfest hér á landi til langs tíma.
Jón segir í samtali við Morgunblaðið að hann hafi fjárfest í fasteignum og minni fyrirtækjum. Um 85% fjárhæðinnar hafi verið fjárfest í fasteignum og 15% í minni fyrirtækjum. „Ég hef fjárfest mest í atvinnufasteignum,“ segir hann. Eftir á að ráðstafa um þriðjungi fjárhæðarinnar sem komið hefur til landsins, að því er fram kemur í viðskiptablaði Morgunblaðsins sem út kom í morgun.