Rúmlega 4 þúsund heimili í vanskilum

Heimili í vanskilum við Íbúðalánasjóð eru 4.024 og þar af eru 643 heimili með frystingu á lánum sínum. Alls voru 8,11% þeirra heimila sem eru með fasteignalán sín hjá Íbúðalánasjóði með lánin í vanskilum í lok október 2013.

Það sem af er ári hefur heimilum í vanskilum fækkað um tæp 15% eða 691 heimili. Hlutfall undirliggjandi lánavirðis einstaklinga í vanskilum heldur einnig áfram að lækka, samkvæmt skýrslu Íbúðalánasjóðs fyrir október.

4,4 milljarðar í vanskilum

Í lok október nam fjárhæð vanskila útlána til einstaklinga 4,4 milljörðum króna og var undirliggjandi lánavirði 77,1 milljarður króna eða um 11,78% útlána sjóðsins til einstaklinga. Þetta samsvarar 0,48% lækkun frá fyrri mánuði.

Fjárhæð vanskila útlána til lögaðila nam alls 4,3 milljörðum króna og nam undirliggjandi lánavirði 33,1 milljarði króna. Tengjast því vanskil 21,93% lánafjárhæðar sjóðsins til lögaðila, sem samsvarar 0,20% lækkun frá fyrri mánuði.

Búið að selja 230 íbúðir í ár

Frá áramótum til loka októbermánaðar hefur Íbúðalánasjóður selt 230 fasteignir, sem er mun meira en þær 105 eignir sem sjóðurinn seldi á sama tímabili í fyrra. Þá er búið að samþykkja kauptilboð í 79 eignir til viðbótar þeim 230 sem eru seldar og vinna nú tilboðshafar að fjármögnun kaupanna.

Af þeim 2.549 eignum sem Íbúðalánasjóður átti í lok október hefur 2.125 eignum verið ráðstafað í leigu, sölumeðferð eða annað. Ríflega 400 eignir bíða frekari greiningar, en flestar þeirra eru á svæðum þar sem nokkurt offramboð er af eignum til sölu eða leigu.

Í lok október átti Íbúðalánasjóður 2.549 fullnustueignir um land allt og hefur eignunum fjölgað um 31 frá því í lok septembermánaðar. Í útleigu voru 1.214 íbúðir um land allt. Langflestar þeirra eru leigðar til fjölskyldna og einstaklinga sem dvöldu í eignunum þegar Íbúðalánasjóður eignaðist þær.

Sjá nánar hér

• 1 blogg um fréttina

Bloggað um fréttina

• Ómar Geirsson: Útburðurinn nær nýjum hæðum.