Íslendingar töluðu að meðaltali í 5,4 daga í símann á síðasta ári, í 7.808 mínútur á hvern Íslending. Þetta gera tæplega 21,4 mínútur í símanum á hverjum degi, en árið á undan töluðu Íslendingar rúmlega 22 mínútur í símann á hverjum degi. Þetta má sjá í tölum frá Póst- og fjarskiptastofnun, en í gær var gefin út tölfræðiskýrsla fyrir síðasta ár.
Stærsti hluti símnotkunar Íslendinga er í gegnum farsíma, en hringd símtöl úr farsímum vörðu í 772 milljón mínútur. Þar sem tveir einstaklingar tala að jafnaði saman í hverju símtali má margfalda þá tölu með tveimur til að fá út heildarfjölda mínútna sem í raun fóru í símtölin.
Heildafjöldi hringdra mínútna úr fastanetinu var um 497 milljón mínútur, en heildarfjöldi talaðra mínútna fyrir alla hluteigandi rétt undir einum milljarði mínútna. Í heild eyddu því Íslendingar um 2,5 milljörðum mínútna við símann á síðasta ári. Það eru um 1,8 milljón dagar í heild.
Hver Íslendingur ver því sem svarar 1,5% af öllum tíma sólarhringsins í símanum. Sé miðað við þann tíma sem flestir eru vakandi er þetta um 2,2% af ráðstöfunartíma hvers dags. Þess ber þó að geta að hér er verið að horfa á meðaltal allra Íslendinga, en ef ungum börnum er sleppt verður talan enn hærri.