Vinsældir netverslunar sjást á kortatölum

Flest bendir þess að einkaneysla hafi vaxið mun hraðar á fyrsta fjórðungi þessa árs en raunin var undanfarin tvö ár. Horfur eru á að vöxtur einkaneyslu á yfirstandandi ári verði talsvert meiri en vöxtur síðasta árs. Þetta segir í greiningu Íslandsbanka, en þar telja menn að heldur hægi á vextinum þegar líður á árið.

Raunvöxtur í kortaveltu einstaklinga nam 6,8% í mars samkvæmt nýbirtum tölum Seðlabankans. Þar af jókst kortavelta innanlands að raungildi um 6,2% en kortavelta erlendis um 12,5%. Vöxturinn var á svipuðum nótum á heildina litið og var fyrstu tvo mánuði ársins. Greiningardeildin bendir á að líkt og undanfarið sé mikill munur á þróun kortaveltu Íslendinga erlendis annars vegar og brottförum þeirra um Keflavíkurflugvöll hins vegar, en brottfarirnar voru 11% færri í síðastliðnum marsmánuði en í sama mánuði í fyrra. Segir í greiningunni að skýringin sé eflaust vaxandi vinsældir erlendra netverslana hér á landi. 

Að jafnaði óx kortavelta einstaklinga um 6,9% á fyrsta ársfjórðungi 2014 frá sama tíma árið áður. Þar af jókst kortavelta innanlands um 5,7% en kortavelta erlendis um 19,9%. Bendir þetta að mati greiningardeildarinnar til þess að vöxtur einkaneyslu hafi verið umtalsverður á fyrsta ársfjórðungi. Aðrar vísbendingar um neyslu heimilanna eru á sama veg. Þannig fjölgaði nýskráningum bifreiða um fjórðung á fyrstu þremur mánuðum ársins frá sama tímabili í fyrra, en bifreiðakaup eru stór hluti þeirrar einkaneyslu sem ekki er greidd með greiðslukortum. 

• Blogga um frétt