Tillögur verkefnisstjórnar um framtíð húsnæðismála verða kynntar fyrir ríkisstjórninni á fundi hennar klukkan 9:30 í dag. Tillögurnar verða kynntar opinberlega síðar í dag.
Í ljósi þess hefur Fjármálaeftirlitið ákveðið að stöðva tímabundið viðskipti með alla skuldabréfaflokka Íbúðalánasjóðs sem teknir hafa verið til viðskipta á aðalmarkaði Nasdaq OMX Iceland hf.
Ákvörðun Fjármálaeftirlitsins er tekin til að vernda jafnræði fjárfesta.
Verkefnisstjórnin er skipuð í samræmi við þingsályktun um aðgerðir vegna skuldavanda heimila á Íslandi sem samþykkt var á Alþingi þann 28. júní síðastliðinn Með samþykki þingsályktunarinnar fól Alþingi ríkisstjórninni að fylgja eftir sérstakri aðgerðaáætlun í tíu liðum til þess að taka á skuldavanda heimila á Íslandi og til að tryggja stöðugleika og gagnsæi á húsnæðislánamarkaði til framtíðar.
Verkefnisstjórninni er meðal annars falið það verkefni að kanna hvaða fyrirkomulag á fjármögnun almennra húsnæðislána á íslenskum húsnæðislánamarkaði sé hagkvæmast og hvernig slíku fyrirkomulagi verði komið á. Jafnframt á verkefnisstjórnin að skoða hvernig unnt sé að tryggja virkan leigumarkað hér á landi sem og skilvirk félagsleg úrræði fyrir þá sem slíkt þurfa.
„Í því sambandi kanni verkefnisstjórnin með hvaða hætti stjórnvöld geti sinnt afmörkuðu hlutverki sem felist í veitingu þjónustu í almannaþágu á húsnæðislánamarkaði. Verkefnið skiptist þannig að meginstefnu til í tvo þætti sem mikilvægt er talið að unnið verði að samtímis eftir því sem kostur er,“ sagði í frétt á vef velferðarráðuneytisins.