Gunnar Guðni Tómasson hefur verið ráðinn framkvæmdastjóri framkvæmdasviðs Landsvirkjunar.
Meginverkefni framkvæmdasviðs snúa að uppbyggingu vatnsafls-, jarðvarma- og vindorkuvirkjana á Íslandi. Dótturfélag Landsvirkjunar, Landsvirkjun Power, sem sér um erlend verkefni samstæðunnar, mun einnig heyra undir framkvæmdastjóra framkvæmdasviðs, segir í tilkynningu frá Landsvirkjun.
Framkvæmdastjóri framkvæmdasviðs heyrir beint undir forstjóra Landsvirkjunar.
Gunnar Guðni hefur síðastliðin þrjú ár starfað sem forstjóri HRV ehf. Þar áður starfaði hann sem forseti Tækni- og verkfræðideildar Háskólans í Reykjavík um fjögurra ára skeið. Frá námslokum 1991 og þar til Gunnar Guðni tók við starfi við HR árið 2007 starfaði hann við fjölbreytt verkfræði- og stjórnunarstörf hjá verkfræðistofunum Vatnaskil og VST auk þess sem hann var dósent við Verkfræðideild Háskóla Íslands um nokkurra ára skeið.
Gunnar Guðni varði doktorsritgerð sína frá MIT háskóla í Bandaríkjunum árið 1991. Áður lauk hann meistaraprófi í byggingarverkfræði frá sama skóla og C.S. gráðu í byggingarverkfræði frá Háskóla Íslands.
Gunnar Guðni er kvæntur Sigríði Huldu Njálsdóttur, hjúkrunarfræðingi, og eiga þau þrjú börn.