Hlutafjárhækkun til að mæta 900 milljóna tapi

Eftir tæplega 900 milljóna króna tap á rekstri Toyota á Íslandi á síðasta ári, sem kom til að stærstum hluta vegna niðurfærslu á viðskiptavild, var hlutafé félagsins nýlega hækkað úr 222 milljónum í 612 milljónir.

Á hluthafafundi Toyota hinn 5. júní var hlutafé félagsins í kjölfarið lækkað um 551,5 milljónir til að mæta uppsöfnuðu tapi á rekstrinum.

Í ViðskiptaMogganum í dag segir Úlfar Steindórsson, forstjóri Toyota á Íslandi, að viðskiptavild félagsins hafi verið lækkuð úr 1.675 milljónum í 1.075 milljónir. Lækkunin endurspegli þá staðreynd að þær rekstraráætlanir sem lagt var upp með við fjárhagslega endurskipulagningu félagsins, sem lauk í ársbyrjun 2012, hafi ekki ræst. „Frá og með vorinu 2012 og á árinu 2013 varð ekki sú aukning í bílasölu sem vonast var eftir,“ útskýrir Úlfar.