Veffyrirtæki sameinast

Hugbúnaðarfyrirtækið Vettvangur og vefstofan Sendiráðið hafa sameinast undir merkjum Sendiráðsins. Alls verða starfsmenn Sendiráðsins þá sjö talsins og er fyrirtækið alfarið í eigu starfsmannanna.

Í fréttatilkynningu segir að með sameiningunni verði til eitt öflugasta fyrirtæki landsins á sviði vefhönnunar og opinna hugbúnaðarlausna.

Skrifstofur Sendiráðsins eru á tólftu hæð í Turninum í Kópavogi. Framkvæmdastjóri Sendiráðsins er Rósa Stefánsdóttir, en hún er jafnframt formaður Samtaka vefiðnaðarins (SVEF).

Sendiráðið var stofnað síðasta haust af reynslumiklu fólki í vefhönnun og markaðssetningu. Með stofnun þess vildu eigendurnir mæta vaxandi þörf fyrir veflausnir byggðar á opnum hugbúnaði auk hönnunar, ráðgjafar og markaðssetningar á netinu. 

Vettvangur er ársgamalt fyrirtæki sem sérhæfði sig í opna vefhugbúnaðarkerfinu Umbraco og hefur Vettvangur meðal annars þróað viðbætur við kerfið sem notaðar hafa verið af viðskiptavinum bæði á Íslandi og erlendis.

• Blogga um frétt