Íslandsbanki hyggur á hlutabréfaútboð á Norðurlöndum eða í London að sögn fjármálastjóra bankans. Skráning á erlendan markað væri „augljóslega“ í hag eigenda. „Þeir eru ekki langtímaeigendur bankans. Þeir myndu frekar vilja selja og kjósa þá fremur erlendan gjaldeyri,“ sagði Jón Guðni Ómarsson, fjármálastjóri bankans í viðtali í Stokkhólmi þann 16. október.
Bloomberg fréttastofan greinir frá þessu. Jón sagði þó að gjaldeyrishöftin væru ákveðin hindrun og að þetta þyrfti að gera í samráði við Seðlabankann. Liggja þarf fyrir hvort heimilt sé að greiða hluthöfum arð í erlendum gjaldeyri áður en efnt verður til útboðsins og þarf Seðlabankinn að veita álit á efninu. Er þetta nauðsynlegt fyrir trúverðugleika bankans gagnvart fjárfestum.
Íslandsbanki hélt fyrsta erlenda skuldabréfaútboð bankans í desember í fyrra. Var það að upphæð 500 milljónir sænskra króna eða sem nemur 9,1 milljörðum íslenskra króna. Skuldabréfin bera 400 punkta ofan á sænska millibankavexti (STIBOR) og eru til fjögurra ára. Alls tóku yfir 40 fjárfestar frá Svíþjóð, Noregi og Finnlandi þátt í útboðinu en umframeftirspurn var eftir bréfunum. Þá sagði Birna Einarsdóttir, bankastjóri Íslandsbanka, í september að fleiri slík útboð væru á döfinni nú þegar áhugi fjárfesta er tekinn að aukast.
Þá endurskoðaði alþjóðlega matsfyrirtækið Standard & Poor´s horfur Íslandsbanka, Arion banka og Landsbankans á dögunum og var þeim breytt úr stöðugum í jákvæðar hjá þeim öllum og lánshæfismatið staðfest sem BB+/B.