Kaupa 3% hlut í VÍS

Hjónin Svanhildur Nanna Vigfúsdóttir og Guðmundur Örn Þórðarson voru á meðal kaupenda í tryggingafélaginu VÍS þegar tilkynnt var í gær að Klakki hefði selt um 15% hlut í félaginu. Seldi Klakki allan eignarhlut sinn, 374 milljónir hluta, en miðað við gengi bréfa VÍS í gær þá nam söluverðmætið um 3.100 milljónum. Fyrir söluna var Klakki stærsti einstaki hluthafi VÍS.

Í samtali við Morgunblaðið staðfesti Svanhildur að félagið SNV Holding, sem er í eigu þeirra hjóna, hefði keypt 3% hlut í VÍS. Að óbreyttu verður félagið sjöundi stærsti hluthafi VÍS en miðað við markaðsverðmæti þess þá er hlutur SNV Holding metinn á ríflega 600 milljónir króna.

Svanhildur segir að þau hafi hug á því að sækjast eftir sæti í stjórn VÍS en líklegt er að brátt verði boðað til hluthafafundar.