Hagnaðar Microsoft dróst saman á síðasta ársfjórðungi en var þó hærri en spár gerðu ráð fyrir þar sem sölutekjur fyrirtækisins vegna skýjalausna og Xbox-leikjatölva voru hærri en áætlað var.
Hagnaður fyrirtækisins nam um 4,5 milljörðum Bandaríkjadala á þriðja ársfjórðungi en hann var um 5,2 milljarðar á sama tímabili í fyrra og dróst því saman um 700 milljónir dollara. Tekjur tímabilsins námu 23 milljörðum dollara og var ársfjórðungurinn sá tekjuhæsti á árinu. Í kjölfar góðra frétta af afkomu tæknirisans hækkuðu hlutabréf hans um 2,75 prósent í verði. Þá jukust tekjur fyrirtækisins vegna skýjalausna um 10 prósent á tímabilinu.
Á blaðamannafundi í vikunni var lögð áhersla á skýjalausnirnar og er talið að tekjur fyrirtækisins vegna þeirra muni nema um 4,4 milljörðum dollara á árinu en Microsoft fjárfestir um 4,5 milljörðum dollara í gagnaverum á hverju ári. Helstu keppinautarnir á þessum markaði eru Google og Amazon. Microsoft rekur nú gagnaver í nítján ríkjum og eru nokkur þeirra svo stór að tvær farþegaþotur kæmust með góðu móti þar fyrir.