Matvælarisinn Nestle hyggst „ráða“ eitt þúsund vélmenni til afgreiðslustarfa í verslunum sínum í Japan.
Vélmennin kallast Pepper og þykja afar vinaleg og skilja meðal annars tilfinningar manna að einhverju marki. Fyrstu starfsmennirnir mæta í vinnuna undir lok ársins en vélmennin munu starfa í kaffiverslunum keðjunnar og ýmist sjá um sölu á kaffivélum og kaffihylkjum. Nespresso kaffivörumerkið er í eigu Nestle.
„Frá og með desember munu vélmennin selja kaffivélar fyrir okkur í stærri verslunum,“ sagði í yfirlýsingu frá Miki Kano, talskonu Nestle í Japan. „Við erum viss um að viðskiptavinir okkar munu njóta þess að versla með þessum hætti og eiga samskipti við vélmennin.“
Pepper vélmennin eru þegar í vinnu hjá fjarskiptafyrirtækinu SoftBank og hafa reynst öflugir sölumenn en ráða má af markaðsrannsóknum að viðskiptavinir eru mjög ánægðir með þjónustuna.
Pepper er 120 sentímetrar að hæð og rúllar áfram á hjólum. Hann er með spjaldtölvu á brjóstinu og er sagður geta tekið þátt í um 78 til 80 prósent allra mögulegra samtala. Vélmennið fer á almennan markað í febrúar og mun kosta um tvö þúsund dollara.
Í eldri frétt mbl.is má sjá myndband af Pepper að störfum: Vélmenni sem skilur tilfinnignar og spjallar