Hjálmar Gíslason, stofnandi og framkvæmdastjóri Datamarket, greinir frá því nú í kvöld á bloggsíðu sinni að fyrirtækið Qlik hafi keypt allt hlutafé í Datamarket ehf. Sé því DataMarket í raun orðið að Qlik á Íslandi. Kaupverðið er um 13,5 milljónir dollara, eða um 1,6 milljarður króna.
Qlik er viðskiptagreindarfyrirtæki og sendi það frá sér tilkynningu eftir lokun markaða í Bandaríkjunum að það hafi keypt allt hlutafél í hinu íslenska fyrirtæki.
Hjálmar segir þjónustu við viðskiptavini fyritækisins á Íslandi ekki munu breytast. Þá tekur hann einnig sérstaklega fram að fyrirtækið sé ekki að flytja úr landi. Stefnt sé að umtalsverðri uppbyggingu hér á næstu misserum.
Þá segir hann viðskiptaferlið hafa verið langt og snúið og að stærsti flæku- og áhættuþátturinn í ferlinu hafi verið gjaldeyrishöftin.
Sjá heimasíðu Hjálmars.