Skyndibitakeðjan McDonald's hefur látið hanna fyrir sig app fyrir spjaldtölvur sem nefnist „Create Your Taste“ og gerir viðskiptavinum kleift að setja saman hamborgara eftir eigin höfði í völdum veitingastöðum keðjunnar í Bandaríkjunum.
Til að byrja með verður boðið upp á þennan möguleika á 30 veitingastöðum í fimm ríkjum Bandaríkjanna. Á næsta ári mun hann síðan ná til tvö þúsund staða samkvæmt fréttavef breska dagblaðsins Daily Telegraph. Þar segir að appið hafi verið í prófun á fjórum veitingastöðum McDonald's í Kaliforníu-ríki síðan árið 2013.
Viðskiptavinir geta valið hvaða brauð, ost, álegg og sósu þeir vilja á borgarann sinn. Þess má geta að skyndibitakeðjan Taco Bell hóf að bjóða upp á hliðstæða þjónustu í haust eins og mbl.is fjallaði um á sínum tíma.