Viðskipti | mbl | 9.2.2015 | 11:17 | Uppfært 11.2.2015 7:45

Íslendingar í HSBC leyniskjölunum

AFP

Í gögnunum sem lekið var úr útibúi breska bankans HSBC í Sviss kemur fram að sex viðskiptavinir með tengingu við Ísland hafi átt um 9,5 milljónir dollara, eða rúma 1,2 milljarða íslenskra króna, á 18 bankareikningunum.

Þetta kemur fram í sundurliðun á gögnunum eftir löndum og fólki á vefsíðu alþjóðlegrar stofnunar rannsóknarblaðamanna, eða International Consortium of Investigative Journalists. Þar segir að sautján prósent þessara sex viðskiptavina séu Íslendingar eða með íslenskt vegabréf, sem þýðir að um einn einstakling sé að ræða. Hæsta fjárhæðin sem einstakur viðskiptavinur með Íslandstengingu geymdi á reikningunum var átta milljónir dollara, eða um einn milljarður íslenskra króna. Voru því fimm viðskiptavinir með þær rúmlega 200 milljónir sem eftir standa.

Ísland situr í 154. sæti á lista yfir þau lönd sem voru með hæstar fjárhæðir á reikningunum.

Fengu greitt út í erlendum gjaldeyri

Í gögnunum kemur fram að útibú HSBC í Sviss aðstoðaði auðuga viðskiptavini sína við að svíkja undan skatti með því að fela milljónir Bandaríkjadala á reikningum hjá bankanum. Þannig var eignum fyrir milljónir Bandaríkjadala stungið undan.

Samkvæmt umfjöllun Guardian gátu viðskiptavinir bankans fengið greitt út í erlendum gjaldeyri af leynireikningum sínum hjá HSBC í Sviss. Eins hafi bankinn markaðssett sig á þann hátt að það höfðaði til auðugra evrópskra viðskiptavina sem vildu losna undan því að greiða skatta heima fyrir.

Samkvæmt HSBC skjölunum, sem ná yfir tímabilið 2005-2007 er hulunni svipt af um 30 þúsund einstaklingum sem áttu um 120 milljarða Bandaríkjadala á leynireikningum hjá HSBC í Sviss.