Hagnaður Félagsbústaða jókst umtalsvert frá fyrra ári og nam 4,7 milljörðum króna á árinu 2014 samanborið við 1,6 milljarða árið 2013.
Rekstrarhagnaður fyrir vaxtagjöld, verðbætur lána og matsbreytingu fjárfestingaeigna jókst um 5,2% milli ára, úr 1,4 milljörðum árið 2013 í 1,5 milljarða árið 2014. Tekjur félagsins námu um þremur milljörðum króna, sem er 4,1 prósent aukning milli ára, en í afkomutilkynningu félagsins kemur fram að það sé aðallega vegna verðlagshækkunar leigu og stækkunar eignasafnsins.
Félagsbústaðir hf, sem eru hlutafélag í eigu Reykjavíkurborgar, eiga og reka félagslegt leiguhúsnæði sem úthlutað er af Velferðarsviði Reykjavíkurborgar. Markmið félagsins er að starfa í þágu almannaheilla og skal rekstur þess vera sjálfbær. Félagið á og rekur 1.817 almennar leiguíbúðir auk 307 þjónustuíbúða fyrir aldraða ásamt 118 litlum íbúðum í sambýlum fyrir fatlað fólk, eða samtals 2.242 íbúðir í Reykjavík. Á árinu 2014 keypti félagið 25 íbúðir og seldi 5 íbúðir.
Rekstrargjöld félagsins hækkuðu um 2,9 prósent milli ára og námu um 1,5 milljarði króna. Af einstökum rekstrarþáttum hækkaði rekstrarkostnaður fasteigna um 12,3% og launakostnaður um 9,9%. Gjaldfært viðhald fasteigna nam um 1,27% af verðmati þeirra í árslok.
Heildareignir Félagsbústaða í árslok 2014 námu ríflega 47 milljörðum króna og jukust um 5,2 milljarða á árinu, eða um 12,3%, aðallega vegna matsbreytingar fjárfestingaeigna félagsins.
Handbært fé frá rekstri nam 571 milljónum króna á árinu 2014 sem er um 127 milljónum meira en árið á undan. Fjárfestingar á árinu 2014 námu 711 milljónum króna miða við 274 milljónir árið áður.