CCP hefur ákveðið að nýta sér rétt til innköllunar á skuldabréf að upphæð tuttugu milljónir dollara. Sigurður Stefánsson, fjármálastjóri CCP, sagði í samtali við Morgunblaðið í dag að þetta væri liður í endurfjármögnun fyrirtækisins, en til viðbótar við skuldabréfin verður lán að upphæð 5,4 milljónir dollara einnig endurfjármagnað.
Sigurður sagði að endurfjármögnunin væri unnin í samstarfi við Arion banka og að umtalsvert betri vaxtakjör hefðu boðist sem varð til þess að ákvörðun var tekin um endurfjármögnunina.
CCP mun greiða bréfin í samræmi við skilmála skuldabréfaflokksins þar sem skuldabréfaeigendur hafa þrjátíu daga frá tilkynningu um innköllun til að tilkynna hvort þeir nýti sér breytirétt. Bréfin, sem eru skráð í Nasdaq OMX Iceland hf., verða afskráð að lokinni innköllun.