Sjónvarpsþátturinn Fortitude, sem tekinn var upp hér á landi, skilaði bresku sjónvarpsstöðinni Sky Atlantic besta áhorfsvexti sem verið hefur í rúman áratug og jók hagnað stöðvarinnar.
Í tilkynningu frá Sky segir að tekjur samstæðunnar hafi vaxið um 5 prósent á fyrri helmingi ársins og rekstrarhagnaður jókst um 20 prósent og nam 1 milljarði punda.
Staðan er sérstaklega góð í Bretlandi og á Írlandi þar sem áhorfið hefur ekki vaxið meira í ellefu ár. Í tilkynningunni segir að stjórnendur stöðvarinnar séu afar spenntir fyrir nýrri þátta gerð og að Fortitude sé vinsælasti þáttur Sky Atlandic í Bretlandi frá upphafi.
Gagnrýnendur hafa verið sáttir með umhverfi þáttanna og sagt það passa vel við ólundarlegt og illúðlegt andrúmsloftið sem birtist í Fortitude. Gagnrýnandi heimasíðunnar A.V. Club sagði að Fortitude skeri sig strax í upphafi úr öðrum dæmigerðum spennuþáttum sem segja frá morðrannsókn í litlum bæ. Staðsetning þáttanna, sem eiga að gerast í litlum bæ á norðurslóðum, er sögð spýta lífi inn í klassíska frásagnarformið sem hefur verið endursagt svo oft.
Business Insider greinir frá þessu.
Frétt mbl.is: Borgaði sig að taka upp á Íslandi