Sprenging hefur orðið í þeirri tegund ferðaþjónustu sem býður skipulegar skoðunarferðir og er hún orðin stærsti einstaki útgjaldaliður erlendrar kortaveltu hér á landi, frétt Rannsóknarseturs verslunarinnar. Meðal slíkra ferða eru náttúruskoðunarferðir, hvalaskoðun, jöklaferðir og aðrar ferðir undir leiðsögn fararstjóra.
Greiðslukortavelta erlendra ferðamanna í þessum útgjaldalið í mars var næstum 2,5 milljarðar kr., sem er 90% hærri upphæð en í sama mánuði í fyrra. Ef bornir eru saman þrír fyrstu mánuðir þessa árs við sömu mánuði í fyrra kemur í ljós að erlend kortavelta jókst í þessum þætti ferðaþjónustunnar um 83%. Sú veltuaukning helst í hendur við mikla aukningu í leyfisveitingum til handa þeim sem bjóða skipulagðar ferðir.
Alls nam erlend kortavelta í mars 9,7 milljörðum kr. sem er 41,6% hærri upphæð en í fyrra. Næsthæsti útgjaldaliður erlendra ferðamanna, á eftir ýmissi ferðaþjónustu, var gistiþjónusta sem nam 1,8 milljörðum í mars og er 42% hærri upphæð en í mars í fyrra.
Þriðji hæsti útgjaldaliðurinn er verslun. Erlendir ferðamenn keyptu vörur í verslunum með kortum sínum fyrir 1,2 milljarða kr. í mars sem er fjórðungsaukning frá mars í fyrra. Stærstur hluti þess er vegna kaupa á fatnaði, líklega aðallega íslenskum útivistarfatnaði.
Af öðrum útgjaldaliðum í kortaveltu erlendra ferðamanna má nefna að liðlega fjórðungsaukning var í veltu á veitingahúsum í mars í samanburði við mars í fyrra. Mikill vöxtur er áfram í veltu bílaleiga. Veltuaukning bílaleiga í mars var 48% frá sama mánuði í fyrra. Þá námu úttektir erlendra ferðamanna á reiðufé með kortum um 877 milljónum kr. eða 20% meira en í mars í fyrra.
Samanlögð kortavelta erlendra ferðamanna fyrstu þrjá mánuði þessa árs var 38% meiri en sömu þrjá mánuði í fyrra.
Ef miðað er við fjölda erlendra ferðamanna um Keflavíkurflugvöll greiddi hver þeirra að jafnaði með greiðslukorti sínu fyrir um 115 þús. kr. í mars. Það er 11,7% hærri upphæð en í mars í fyrra. Með því að leiðrétta þessa upphæð fyrir verðlagsbreytingum síðustu 12 mánaða nam hækkunin 9,9% á milli ára.
Ferðamenn frá Sviss keyptu að jafnaði fyrir hæstu upphæðir með greiðslukortum eða 264 þús. kr. á hvern ferðamann. Spánverjar fylgja þar fast á eftir með 211 þús. kr.
Velta eftir þjóðernum ræðst meðal annars af því hversu löng dvölin hér á landi er og hvort greitt hafi verið fyrir ferðina áður en komið er til landsins auk þess sem mismunandi er í hve miklum mæli ferðamenn greiða með greiðslukortum. Þá þarf að hafa í huga að tölur um fjölda ferðamanna um Keflavíkurflugvöll ná ekki til allra þeirra sem koma til landsins.
Í því talnaefni sem Rannsóknasetur verslunarinnar hefur yfir að ráða er nánar hægt að greina kortaveltu erlendra ferðamanna eftir útgjaldaliðum og þjóðerni.