Bréf Icelandair taka kipp eftir tilkynningu

Mikil viðskipti hafa verið með bréf Icelandair Group í Kauphöllinni í morgun og nemur veltan alls 307 milljónum króna. Bréfin hafa þegar hækkað um 2 prósent í verði. Félagið sendi frá sér tilkynningu í morgun þar sem fram kemur að afkoman á fyrsta ársfjórðungi verði að líkum betri en ráðgert var í upphafi árs, aðallega vegna hærri tekna og betri nýtingar. 

Gert er ráð fyrir að EBITDA verði neikvæð um USD 2-4 milljónir. Sætanýting í millilandaflugi var 4,9 prósentustigum hærri en á sama tímabili á síðasta ári og herbergjanýting hótela var 7,8 prósentustigum hærri. Á móti kemur að þróun EUR/USD hefur verið óhagstæðari en gert var ráð fyrir.

Góðar horfur fyrir árið

Horfur fyrir árið í heild eru góðar og bókanir fyrir stærstu mánuði ársins líta vel út. Í afkomuspá fyrir árið í heild gerir félagið nú ráð fyrir að EUR/USD krossinn verði að meðaltali 1,07 á síðustu 9 mánuðum ársins en í afkomuspá sem birt var í byrjun febrúar var gert ráð fyrir að krossinn væri 1,15.

Styrking USD gagnvart Evrópumyntum hefur og mun hafa neikvæð áhrif á afkomu félagsins,
sérstaklega á háannatíma. Betri afkoma á fyrsta ársfjórðungi gerir það að verkum að afkomuspá félagsins fyrir árið í heild helst óbreytt, þrátt fyrir óhagstæða gengisþróun. Félagið gerir ráð fyrir að fyrir að EBITDA verði á bilinu 160-165 milljónir USD. Starfsemi félagsins er mjög háð ytri aðstæðum, svo sem sveiflum á gjaldmiðla- og eldsneytisverðum og óvissa á vinnumarkaði á Íslandi getur haft veruleg áhrif á afkomuna.

Árshlutareikningur félagsins fyrir fyrsta ársfjórðung 2015 verður birtur 29. apríl n.k.

• Blogga um frétt