Bonefide lögmenn til Vestmannaeyja

Bonafide lögmenn munu opna nýja starfsstöð í Vestmannaeyjum þann 8.maí n.k. Lögmannsstofan mun hafa aðsetur að Vesturvegi 10, en hún er fyrir á Klapparstíg 25-27 í Reykjavík. Stofnendur stofunnar, Lúðvík Bergvinsson og Sigurvin Ólafsson, eru báðir Vestmannaeyingar. 

„Við erum hæstánægð með að vera loksins að opna í Vestmannaeyjum, og hlökkum við Sigurvin mikið til að starfa á ný í okkar heimabæ. Með opnuninni í Eyjum skapast einnig ný staða fyrir háskólamenntaðan mann í sveitarfélaginu, sem okkur þykir einnig jákvæð viðbót,“ er haft eftir Lúðvík Bergvinssyni, eiganda, í tilkynningu.

Við stofuna mun starfa einn staðbundinn starfsmaður, Aníta Óðinsdóttir, en allir starfsmenn stofunnar í Reykjavík koma einnig að störfum þar. Aníta útskrifaðist með meistarapróf í lögfræði frá Háskólanum í Reykjavík árið 2013. Hún er fædd og uppalin í Vestmannaeyjum, og hefur frá útskrift starfað hjá Sýslumanninum í Kópavogi og Vestmannaeyjum, við almenn störf á lögfræðisviði.

Starfsfólk Bonafide sinnir málaflokkum á öllum sviðum lögfræðinnar fyrir einstaklinga, fyrirtæki, opinberar stofnanir, sveitarfélög og erlenda aðila.

Í tilkynningu segir að opnunin í Vestmannaeyjum komi í kjölfar aukinnar eflingar stofunnar. „Má þar meðal annars nefna að um áramótin síðustu bættist Elín Hrefna Ólafsdóttir lögmaður í eigendahóp stofunnar. Elín er 26 ára gömul og útskrifaðist með meistarapróf í lögfræði frá Háskóla Íslands árið 2013 og hlaut lögmannsréttindi sín sama ár.“

• Blogga um frétt