Kínverjar elska Chanel

Hvað lúxusvörur varðar stendur Chanel á toppnum í Kína. Auðugir Kíverjar segjast kaupa mest af Chanel, þekkja merkið best og velja það helst til gjafakaupa. Í sætunum þar á eftir koma Dior, Hermes, Gucci og Lois Vuitton.  

Þetta kemur fram í nýrri rannsókn sem unnin var á vegum fyrirtækisins Bomoda Goup, sem sérhæfir sig í rannsóknum á kauphegðun kínverskra neytenda.

Niðurstöður rannsóknarinnar sýna að um 41 prósent auðugra Kínverja keyptu sér Chanel vöru á síðasta ári. Tískuhúsið ber þannig höfuð og herðar yfir helsta keppinaut sinn- Dior - sem var einungis með 32 prósent markaðshlutdeild.

En hvað skýrir þessa yfirburði? Í grein CNN Money er haft eftir Brian Buchwald, sem stóð að rannsókninni, að Chanel hefði lagt gríðarlega áherslu á markaðsstarf í Kína og lagt mikla áherslu á samfélagsmiðla og fræga fólkið þar í landi. Það hefði augljóslega skilað sér.

Lúxusvörur geta átt greiðan aðgang að kínverska markaðnum þar sem neytendur þar í landi virðast tilbúnir til þess að eyða stærri hluta tekna sína í slíkan varning. Hins vegar telst markaðurinn einnig erfiður að því leyti að eftirlíkingar eru afar algengar.

• Blogga um frétt