fjárfestingar Fjárfestingafélagið Eyrir Invest skilaði þriðja árið í röð tapi á síðastliðnu ári og nam það 33,7 milljónum evra eða 5 milljörðum króna, í samanburði við 2,8 milljarða árið á undan og 2,1 milljarð króna árið 2012. Sjóðsstreymi frá rekstri síðasta árs var neikvætt sem nam 181 milljón króna. Eignir í efnahagsreikningi voru skráðar í lok árs á 318,700 milljón evrur eða 47,2 milljarða króna og lækkuðu um 2,2 milljarða frá árinu á undan. Skuldir voru í lok ársins 27 milljarðar króna og hækkuðu um 20 milljónir króna milli ára. Eigið fé lækkaði milli ára og var eiginfjárhlutfallið í árslok 42% í samanburði við 50% árið á undan. Laun og tengd gjöld námu 135 milljónum króna á árinu, þar af voru greiddar 85 milljónir króna til stjórnarformanns og þriggja framkvæmdastjóra. Í félaginu eru 7 stöðugildi.
Stærstu einstöku eignir félagsins eru 29% hlutur í Marel og 17% í eignarhaldsfélagi sem á hollenska félagið Stork BV. Meðal stærstu eigenda Eyrir Invest eru Landsbankinn, Þórður Magnússon, Árni Oddur Þórðarson og Lífeyrissjóður verslunarmanna.