Air Greenland hefur keypt þrjátíu prósent hlut í Norðurflugi en fjárfestingin nemur um tvö hundruð milljónum króna. Með kaupunum tekur Norðurflug yfir tvær þyrlur frá Air Greenland auk þess sem önnur verður í láni í vetur og næsta sumar. Þyrlum Norðurflugs fjölgar þar með úr tveimur í fimm.
Birgir Ómar Haraldsson, framkvæmdastjóri Norðurflugs, segir félögin tvö hafa átt í góðu samstarfi í tæplega fimm ár en fyrirtækið hefur t.d. áður verið með þyrlurnar tvær frá Air Greenland í láni. Þá segir hann að mikill vöxtur hafi verið í starfseminni á liðnum árum og bætir við að fleiri þyrlur bjóði upp á fleiri ferðir og meiri sveigjanleika í bókunum.
Birgir segir Norðurflug græða á reynslu Air Greenland í þyrlurekstri en félagið starfar á víðu sviði og er með um tuttugu þyrlur í rekstri.
Mikill vöxtur hefur verið í starfsemi Norðurflugs á liðnum árum sem hefur notið góðs að auknum fjölda ferðamanna.
„Vöxturinn frá árinu 2009 er mjög áhugaverður en þá byrjuðum við að bjóða upp á þessar vinsælu pakkaferðir,“ segir Birgir og bætir við að áður fyrr hafi aðeins verið rukkað fyrir hverja klukkustund í lofti.
„Það var ekki hægt að bjóða túristum sem þekkja ekki landið upp á það,“ segir hann. Á heimasíðu Norðurflugs eru sextán mismunandi pakkaferðir í boði, sem kosta allt frá 25.500 krónum til 399.900 krónur á mann.