Áherslan á afslátt skattsvikara

Bjarni Benediktsson fjármálaráðherra.
Bjarni Benediktsson fjármálaráðherra. mbl.is/Eggert

Bjarni Benediktsson ætlar að leggja frumvarpsdrög um skattagrið fyrir efnahags- og viðskiptanefnd í haust og athuga hvort hægt verði að ná samstöðu um efnið. Drögin gera ráð fyrir að skattsvikarar geti komið fram með vantaldar tekjur eða eignir erlendis gegn því að fallið verði frá refsimeðferð.

Starfs­hóp­ur um gerð griðareglna skilaði frumvarpsdrögum til fjár­mála- og efna­hags­ráðherra í mars. Til stóð að kynna málið í ríkisstjórn við fyrsta tækifæri þar sem reglurnar gerðu ráð fyrir að menn gætu stigið fram með eignirnar fyrir 30. júní sl.

Bjarni segir málið hafa fallið í grýttan jarðveg á þingi. „Málið er þeirrar gerðar að ef ekki er um það samstaða að fara þessa leið ætla ég ekki að fara eyða mikilli orku í að berjast fyrir því að það verði samþykkt,“ segir hann.

Því stefnir hann á að leggja skýrslu starfshópsins í hendur efnahags- og viðskiptanefndar sem verður falið að skoða hana ofan í kjölinn. 

Afsláttur af lögbroti?

„Mér fannst öll áherslan í þinginu vera á það að með því að fara þessi leið væri verið að veita mönnum einhvers konar afslátt af því að hafa brotið lög,“ segir Bjarni aðspurður um mótstöðuna sem frumvarpsdrögin mættu. 

„Staðreyndin er hins vegar sú að menn munu aldrei geta upplýst um öll brot. Þarna er farin sú leið að skapa hvata fyrir menn að gera hreint fyrir sínum dyrum,“ segir Bjarni og vísar til þess að aðferðin hafi leitt til stóraukinnar skattheimtu í nágrannaríkjum.

Lög um einhvers konar skattagrið hafa t.d. verið samþykkt í Danmörku, Svíþjóð, Noregi, Finnlandi, Bretlandi, Frakklandi og Þýskalandi.

Ekkert heyrt um áhuga

Aðspurður hvort hann hafi orðið var við utanaðkomandi áhuga á þessari leið segist hann ekkert hafa heyrt um það. Þá getur hann ekki heldur sagt til hvort skattagögnin sem embætti skattrannsóknarstjóra keypti í sumar gætu orðið grundvöllur að meðferð mála samkvæmt þessum reglum.

Rétt er þó að taka fram að frum­varpsdrögin gera ráð fyrir að ekki sé hægt að nýta sér heim­ild­ina ef skatt- eða lög­reglu­yf­ir­völd hafa þegar hafið eft­ir­litsaðgerðir eða skatt­rann­sókn sem bein­ist að eign­um eða tekj­um er­lend­is.

Samkvæmt drögunum verður lagt álag á van­tald­an skatt­stofn og endurákv­arðaða gjaldið þarf að greiða inn­an tíu daga eft­ir dag­setn­ingu ákvörðunar. Van­ræksla myndi leiða til refsimeðferðar. 

Álags­pró­sent­an er ekki ákveðin en í dæma­skyni er miðað við að álagið á van­fram­töldu tekj­urn­ar verði 35%. Sam­kvæmt gild­andi rétti er beitt 25% álagi á endurákv­arðaðar tekj­ur. Ávinn­ing­ur skattaðilans er að hon­um yrði hvorki gerð refs­ing né þyrfti hann að greiða sekt­ir.

Líkt og fram hefur komið er skattrannsóknarstjóri í óðaönn að fara í gegnum aðkeypt gögn um eignir Íslendinga í skattaskjólum. Þrjátíu millj­ón­ir króna voru greiddar fyrir gögnin sem tengj­ast 400 til 500 fé­lög­um er­lend­is. Á bak við hvert fé­lag er oft á tíðum fleiri en einn skatt­skyld­ur aðili á Íslandi.

Skattrannsóknarstjóri hefur reynt að hafa hraðar hendur þar sem möguleg hætta er á að ein­hver mál fyrn­ist. Mis­mun­andi er hvenær skatta­mál fyrn­ast, en venju­lega er miðað við 6 ár varðandi endurákvörðun, en lengri tíma með refsi­mál.

Aðferðin hefur leitt til aukinnar skattheimtu í nágrannaríkjum.
Aðferðin hefur leitt til aukinnar skattheimtu í nágrannaríkjum. Golli / Kjartan Þorbjörnsson
Bryndís Kristjánsdóttir, skattrannsóknastjóri. Embættið er nú að fara yfir aðkeypt ...
Bryndís Kristjánsdóttir, skattrannsóknastjóri. Embættið er nú að fara yfir aðkeypt gögn um eignir Íslendinga í skattaskjólum. mbl.is/Árni Sæberg
mbl.is

Bloggað um fréttina

Svæði

Gagnaveitur

Erlendar viðskiptafréttir