Gert er ráð fyrir að tollar á fatnað og skó verði afnumdir um áramótin. Áramótin 2016 til 17 verða tollar á aðrar vörur en tilteknar matvörur fjarlægðir. Þannig verður ýmis fatnaður, heimilistæki, búsáhöld, barnavörur og bílavarahlutir tollfrjálsir. En hverju skilar þetta neytendum?
Í töflunni hér að ofan má sjá nokkur dæmi um vörur sem margir þurfa reglulega að kaupa. Eftir afnám 15 prósent tolls á t.d. barnaúlpu sem kostar 10.590 krónur ætti sama úlpa að kosta 9.209 krónur og sparnaðurinn væri því 1.381 króna.
Samkvæmt dæminu hér fyrir ofan gætu nokkuð hefðbundin fatainnkaup fyrir börnin í upphafi skólaárs orðið tæpum 12 þúsund krónum ódýrari.
Við kynningu á fjárlagafrumvarpinu sagði Bjarni Benediktsson, fjármálaráðherra, að eftir breytingarnar ætti verslun á Íslandi að standa fyllilega jafnfætis allri sérvöruverslun á Norðurlöndunum. Netverslun yrði þá einnig hagstæðari.
Samtök verslunar og þjónustu hafa lengi rætt um óhagstæða samkeppnisstöðu íslenskrar verslunar og hvatt stjórnvöld til þess að afnema tolla. Í tilkynningu frá samtökunum segir að afnám tolla muni strax hafa jákvæð áhrif á fjárhag fjölskyldnanna í landinu, ekki síst hinna efnaminni. „Allar kannanir sýna enda að það eru efnaminnstu fjölskyldurnar sem eru ólíklegastar til að kaupa sér föt og skó erlendis,“ segja samtökin.
Samtökin vilja þó ekki láta hér við sitja heldur hvetja einnig til þess að föt og skór verði færð í neðra þrep virðisaukaskatts. „Það er skref sem verður að taka til að íslensk fataverslun keppi á jafnréttisgrundvelli við erlenda fataverslun,“ segja samtökin.