Viðskipti | mbl | 20.10.2015 | 14:10

Koma upp um blekkingar hótela

Fámennt og notalegt. Mynd/The Oyster

Á vefsíðum hótela er stundum að finna myndir af allri aðstöðu sem eru gjörólíkar raunveruleikanum. Ströndin er hreinni, sundlaugin er stærri og færri eru á bakkanum. Vefsíðunni The Oyster er hins vegar ætlað að sjá í gegnum þetta.

The Oyster er bókunarsíða á borð við margar aðrar, og sambærileg TripAdvisor, en í stað þess að byggja á gagnrýni neytenda er byggt á gagnrýni starfsmanna vefsíðunnar.

The Oyster er með 45 starfsmenn í fullri vinnu við að ferðast um heiminn, gista á hótelum og skoða alla þjónustu. Þeir birta eigin myndir og eru óhræddir við að benda á það sem samræmist ekki uppgefnum upplýsingum. Síðan var stofnuð árið 2009 og hefur vaxið hratt en árlegir notendur eru um tíu milljónir talsins.

Reglulegur liður hjá þeim nefnist „Photo Fakeout“. Þar hafa starfsmenn Oyster tekið myndir frá nákvæmlega sama sjónarhorni og er birt á heimasíðu hótelsins.

Hér að neðan má sjá nokkrar myndir af samanburðinum en fleiri má sjá á heimasíðu Oyster.