Gjaldþrotaskiptum á Barra hf., sem hélt utan um rekstur samnefndrar gróðrarstöðvar á Egilsstöðum, er lokið. Kröfurnar námu alls tæpum 257 milljónum króna og alls fengust um 153 milljónir króna greiddar.
Þetta kemur fram í Lögbirtingarblaðinu í dag en skiptum var lokið hinn 5. nóvember sl. Gróðrarstöðin var tekin til gjaldþrotaskipta hinn 8. janúar 2013.
Í janúar 2004 keypti Félag skógarbænda á Héraði allt hlutafé ríkisins í Barra, sem nam 12 milljónum króna að nafnvirði eða 22,39% af heildarhlutafé fyrirtækisins. Félagið var þá stærsti hluthafinn ásamt Skógræktarfélagi Reykjavíkur. Í kjölfar fjármálakreppunnar 2008 jukust skuldir félagsins verulega og var því gripið til fjárhagslegrar endurskipulagningar.
Árið 2013 keypti nýtt félag, Gróðrarstöðin Barri ehf., reksturinn út úr þrotabúinu en Byggðastofnun leysti til sín fasteignir. Gróðrarstöðin er starfandi í dag.