Húsasmiðjan lækkar verð á byggingarvörum

Húsasmiðjan kynnti í dag allt að 20% lækkun á listaverði á byggingarvörum, svo sem timbri, plötum, einangrun, steypustáli, skrúfum og festingum.

„Lækkuninni er meðal annars náð með því að einfalda afsláttarkerfi Húsasmiðjunnar. Áfram verða veittir afslættir vegna magnkaupa en dregið er úr öðrum afsláttum. Verðlisti verslunarinnar er því orðinn gegnsærri, sem er í takt við þróun í smásöluverslun,“ segir í fréttatilkynningu.

Með því að lækka verðlista sína tekur Húsasmiðjan á sig nokkurt tekjutap en stjórnendur fyrirtækisins telja að gegnsærra verð muni auka viðskiptin við almenning og fagmenn ásamt því að sölu- og afgreiðsluferlið verður hraðara. Þessi lækkun mun stuðla að lækkun byggingarkostnaðar. Þá eru það hagsmunir allra að sporna gegn verðbólgu og óæskilegum þensluáhrifum á því hagvaxtarskeiði sem farið er í hönd á Íslandi, samkvæmt fréttatilkynningu sem Húsasmiðjan hefur sent frá sér.

• Blogga um frétt