Samkeppniseftirlitið hefur samþykkt samruna fasteignafélaganna Regins, Ósvarar og CFV 1. Reginn undirritaði kaupsamning um kaup á fyrrnefndum félögum hinn 30. desember síðastliðinn en samningurinn var gerður með fyrirvara um samþykki eftirlitsins.
Heildarvirði keyptra fasteignasafna er rúmir tíu milljarðar króna og greitt var fyrir eignarhluti í félögunum með hlutafé í Regin að nafnvirði 134,5 milljón hlutir. Á fasteignasöfnunum hvíla lán sem nema um 7,5 milljörðum króna en skilmálar lánanna bjóða upp á endurfjármögnun án kostnaðar.
Helstu eignir félaganna á höfuðborgarsvæðinu eru: Mjölnisholt 12-14, Lágmúli 6-8, Hlíðasmári 4, Hlíðasmári 6, Hlíðasmári 12, Túngata 7, Suðurhraun 3, Dalshraun 15, Fiskislóð 53-59, Hólmaslóð 4, Hólmaslóð 2, ásamt nokkrum minni eignum.
Áætlað er að EBITDA Regins hækki að lágmarki um 720 milljónir króna á ársgrundvelli og eignasafn stækki um 15 prósent miðað við fermetra við kaupin.