Wizz Air hefur flug til Vilnius

Ungverska lággjaldaflugfélagið Wizz Air mun í október hefja flug milli Vilnius í Litháen og Keflavíkur. Flogið verður allt árið um kring. Félagið flýgur þegar til Gdansk, Varsjár og Búdapest og talskona útilokar ekki fleiri flugleiðir.

Það stefnir því í að Wizz Air verði eitt umsvifamesta erlenda flugfélagið hér á landi yfir vetrarmánuðina.

Túristi greinir frá þessu. WOW air flýgur vikulega til Vilnius yfir sumarmánuðina og Wizz air verður því fyrsta félagið sem býður upp á vetrarflug milli Litháen og Íslands.

Í samtali við Túrista segist Gabor Vasarhelyi, talskona Wizz Air, ekki útiloka að flugið til Íslands eigi eftir að aukast enn frekar. Enda séu forsvarsmenn félagsins sífellt í viðræðum við flugvelli um hugsanlegar nýjar leiðir. 

Wizz Air er í dag með starfsstöðvar á 25 flugvöllum í austurhluta Evrópu og flýgur þaðan til fjölmargra áfangastaða um alla álfuna.

Með auknum umsvifum félagsins hér á landi aukast því líkurnar á að borgir í Rúmeníu, Serbíu, Úkraínu og víðar bætist við þá staði sem flogið er beint til frá Keflavíkurflugvelli.

• Blogga um frétt