Lögmannsstofan Juris tapaði máli gegn þrotabúi fjárfestisins Guðmundar A. Birgissonar, sem kenndur við bæinn Núpa í Ölfusi, í Héraðsdómi Reykjavíkur í gær.
Lögmannsstofan hafði lýst 12,8 milljóna króna kröfu í þrotabúið og var henni mótmælt. Krafan var vegna ætlaðrar innheimtuþóknunar Juris af kröfu Guðmundar í þrotabú breska félagsins ISIS Investment Ltd.
Guðmundur kom víða við í viðskiptalífinu fyrir hrun og var m.a. einn hluthafa í félaginu Lífsvali, sem átti tugi jarða víða um landið. Þá var hann t.d. hluthafi í Bang & Olfusen á Íslandi, Hótel Borg.
Málsatvik voru með þeim hætti að Juris tók að sér árið 2010 að lýsa kröfu Guðmundar í þrotabú ISIS. Hún var að fjárhæð 1,8 milljónir punda, eða sem jafngildir 326 milljónum króna á núverandi gengi.
Í innheimtusamningi átti Juris rétt á 5% af því fé sem myndi greiðast upp í kröfuna fyrir sína vinnu.
Árið 2013 var Guðmundur úrskurður gjaldþrota og í kjölfarið gerði skiptastjóri þrotabús hans samning við Mön Investment og Kaupþing um kaup á kröfunni fyrir rúmar 257 milljónir króna. Samkvæmt upphaflegum samningi átti greiðslan að renna inn á reikning Juris.
Á árinu 2014 var hins vegar gerður viðauki við samninginn og greiðslufyrirkomulaginu breytt. Greiðsla rann að hluta til Kaupþings upp í skuldir, að hluta til Guðmundar og að lokum inn á reikning lögmannsstofu skiptastjóra.
Í framhaldinu lýsti Juris fyrrnefndri 12,8 milljóna króna kröfu í þrotabú Guðmundar, sem er 5% af 257 milljóna króna kaupverðinu. Taldi lögmannsstofan kröfu sína vera forgangskröfu við gjaldþrotaskiptin.
Skiptastjóri Guðmundar mótmælti þessu þar sem Juris hafði ekki komið að viðskiptunum.
Héraðsdómur féllst ekki á kröfu Juris. Einföld greiðslufyrirmæli í upphaflegum sölusamning voru ekki talin nægileg. Þá vísaði dómari til sérfræðiþekkingar Juris. Um væri að ræða lögmannsstofu sem er sérhæfð í stofnun veðsamninga og tryggingaráðstöfunum.
Hún verði að bera hallann af því að hafa ekki með fullnægjandi hætti gætt að réttindum sínum við alla samningagerð.