Hagnaður Vátryggingafélags Íslands nam 145 milljónum króna á fyrsta ársfjórðungi, en til samanburðar var 733 milljóna króna hagnaður á sama fjórðungi í fyrra. Munar þar mestu um að tekjur af fjárfestingarstarfsemi eru mun minni en í fyrra. Þær námu 435 milljónum, í samanburði við 1.113 milljónir á fyrsta ársfjórðungi 2015.
Samsett hlutfall VÍS var 104,5%, sem er svipað og á sama ársfjórðungi í fyrra þegar það var 105,2%.
Iðgjöld námu alls 4,3 milljörðum króna og jukust um tæplega 9% á milli ára. Tjón á tímabilinu námu 3,4 milljörðum og jukust um 10% miðað við fyrsta ársfjórðung í fyrra.
Eignir VÍS námu 32,5 milljörðum króna í lok ársfjórðungsins. Eiginfjárhlutfall stóð í 30,2% en það var 39,1% í lok mars í fyrra. VÍS hefur greitt út arð og keypt eigin hlutabréf á undanförnu ári, auk þess sem félagið gaf út víkjandi skuldabréf í lok febrúar sem lið í endurskipulagningu á fjármagnsskipan þess.
Stjórnendur vænta þess að ágætur vöxtur verði í iðgjöldum á þessu ári og að samsett hlutfall verði lægra en það var í fyrra.
Sigrún Ragna Ólafsdóttir, forstjóri VÍS, segir afkomuna á fyrsta ársfjórðungi hafa verið undir væntingum þrátt fyrir ágætan vöxt í innlendum iðgjöldum. „Afkoman litast af slakri afkomu af skaðatryggingastarfsemi en tap er af bæði frjálsum og lögboðnum ökutækjatryggingum á tímabilinu.“