Bílainnflutningur jókst um 75%

Hagfræðideild Landsbankans spáir að hagvöxtur á þessu ári verði 5,4 prósent sem er talsvert meiri hagvöxtur en gert var ráð fyrir í þjóðhags- og verðbólguspá deildarinnar frá nóvember 2015.

Hagvöxtur verði að meðaltali 4,3 prósent á árunum 2017 og 2018. Verðbólguhorfur eru nú taldar betri en áður og gert er ráð fyrir að verðbólga verði að meðaltali 1,9 prósent á þessu ári og að meðaltali 3,6 prósent á næstum tveimur árum.

Þetta kemur fram í uppfærðri þjóðhags- og verðbólguspá Hagfræðideildar Landsbankans sem birt var í dag. Spáin nær til ársloka 2018.

Mikill vöxtur í útflutningi ásamt verulega hagstæðri þróun erlendrar skuldastöðu þjóðarbúsins bendir til þess að krónan gæti styrkst nokkuð á spátímanum samkvæmt spánni.

Gert er ráð fyrir að húsnæðiskostnaður verði áfram ráðandi þáttur í þróun verðbólgu.

Dýrari bílar fluttir inn

Á fyrsta ársfjórðungi þessa árs jókst bílainnflutningur um ríflega 75 prósent á milli ára þegar horft er til innflutningsverðmætis. Þetta er tvöfalt meiri aukning en á sama tímabili í fyrra. Svo virðist sem nú séu fluttir inn dýrari bílar en undanfarin misseri en meðalverðmæti innfluttra bifreiða hækkaði um tólf prósentustig milli ára, mælt á föstu gengi.

Reiknað er með að vöxtur einkaneyslu komi að langmestu leyti fram í aukinni neyslu á varanlegum neysluvörum, þ.m.t. bifreiðum, ásamt tíðari ferðalögum til útlanda. Hagvaxtaráhrif aukinnar einkaneyslu verða því minni en ella þar sem innflutningur eykst verulega á móti.

Gert er ráð fyrir að erlendum ferðamönnum fjölgi um 35 prósent á þessu ári, um fimmtán prósent á næsta ári og um tíu prósent árið 2018. Ef spáin gengur eftir munu tæplega 2,2 milljónir ferðamanna koma til landsins árið 2018.

• Blogga um frétt