Kvika hagnast um 378 milljónir

Kvika banki hagnaðist um 378 milljónir á fyrri hluta ársins. Hreinar rekstrartekjur námu 2.164 milljónum á tímabilinu samanborið við 2.535 milljónir á seinni helmingi ársins 2015. Rekstrarkostnaður nam 1.668 milljónum króna á fyrri hluta árs 2016.

Í lok júní 2016 námu heildareignir samstæðu Kviku 77.825 milljónum króna samanborið við 61.614 milljónir króna í árslok 2015 og nemur hækkunin 26% á tímabilinu. Útlán til viðskiptavina námu 23 milljörðum króna í lok júní 2016. Almenn innlán og peningamarkaðsinnlán jukust um rúma 14 milljarða króna, eða 30%, á árinu.

Eiginfjárhlutfall í lok júní var 18,0% samanborið við 23,5% í árslok 2015. Í tilkynningu frá bankanum kemur fram að lækkunin sé í samræmi við áætlun og skýrist að miklu leyti af lækkun hlutafjár sem samþykkt var á hlutahafafundi fyrr á árinu. Þá segir að bankinn sé vel í stakk búinn til að takast á við mögulegt fjárútflæði í kjölfar afnáms fjármagnshafta, en lausafjárþekja bankans var 211%.

Haft er eftir Sigurði Atla Jónssyni, forstjóra Kviku, að bankinn hafi náð rekstrarlegum markmiðum sem voru sett við sameiningu Straums fjárfestingabanka og MP banka. „Afkoma Kviku er góð og í samræmi við áætlanir, eftir aðeins eitt ár í rekstri. Fjárhagslegur styrkur bankans er mikill. Við byggjum á þeim grunni og nýtum þekkingu og færni starfsfólks Kviku til að sækja fram.“

Kvika fjárfestingarbanki varð til við sameiningu MP banka og Straums. mbl.is/Golli

• Blogga um frétt