Hlutabréf í Deutsche Bank hafa fallið í morgun í kjölfar fregna þess efnis að stjórn bankans hafi mistekist að ná samningum vup bandarísk stjórnvöld vegna sektar upp á 14 milljarða Bandaríkjadali.
Bréfin féllu töluvert í morgun og eins og staðan er núna hafa þau fallið um 2%.
Viðræðum milli bankastjóra Deutsche Bank, John Cryan, og bandarískra stjórnvalda um helgina lauk án samninga en bandaríska dómsmálaráðuneytið hefur krafið þýska bankann um fyrrnefnda 14 milljarða Bandaríkjadala í tengslum við rannsókn á verðbréfaútgáfu bankans.
Cryan var staddur í Bandaríkjunum um helgina til þess að fara á haustfundi Alþjóðabankans og Alþjóðagjaldeyrissjóðsins. Fjárfestar bankans vonuðust til þess að hann myndi nýta ferðina og semja við bandarísk stjórnvöld en það náðist ekki að þessu sinni.
Í lok síðasta mánaðar höfðu hlutabréf í Deutsche Bank ekki verið lægri í 33 ár en þau höfðu hækkað lítillega síðustu daga.