Gamla smiðjan færir út kvíarnar

Pizzastaðnum Gömlu smiðjunni við Lækjargötu var lokað í síðustu viku vegna breytinga. Að sögn eiganda staðarins, Sverris Einars Eiríkssonar, stendur til að opna aftur á næstu vikum. 

Gamla smiðjan hóf starfsemi í Þrastarlundi í sumar og segir Sverrir að stefnt sé að því að opna á fleiri stöðum á næstu mánuðum. Er fyrirtækið til að mynda að bíða eftir samþykki fyrir því að fá að opna stað í Skipholti um áramótin. 

„Reksturinn gengur bara hrikalega vel,“ segir Sverrir í samtali við mbl.is en Gamla smiðjan opnaði í Þrastarlundi 1. júlí. „Við vissum að það yrði brjálað að gera þar í sumar en fyrri partinn í september byrjaði að róast. Við ákváðum að bregðast við með því að láta fólk vita af staðnum og síðan þá hefur verið brjálað að gera allar helgar.“

Hann segir mikinn fjölda Íslendinga koma á staðinn hverja helgi en þá er einnig slatti af erlendum ferðamönnum. Segir hann fólk koma alls staðar að, ekkert endilega bara úr nærliggjandi sveitum. „Við erum að fá fólk úr Vesturbænum, Garðabæ, Hafnarfirði, Hveragerði og Selfossi. Það er búið að vera alveg stappað.“

Gamla smiðjan í Þrastarlundi. Ljósmynd/Gamla smiðjan

Útsýnið er ekki slæmt. Ljósmynd/Gamla smiðjan

• Blogga um frétt