Sala þriggja félaga á 69% hlut í Ölgerðinni sem tilkynnt var um í gær frestar skráningu fyrirtækisins á markað, en enn er þó gert ráð fyrir skráningu á næstu fimm árum. Þetta má lesa úr svari stjórnarformanns Ölgerðarinnar við spurningu mbl.is hvort áfram sé áformað að skrá félagið á markað.
Segir þar að stefnt hafi verið að skráningu Ölgerðarinnar, en að ef kæmi til beinnar sölu myndi það flýta fyrir sölu eignarhaldsfélagsins Þorgerðar á 45% hlut sínum í Ölgerðinni. Þar af leiðandi var farið í söluferlið sem nú er lokið. „Það er hinsvegar samkomulag um það milli okkar og nýju fjárfestana að skrá félagið á næstu 5 árum, þegar aðstæður eru hagstæðar,” segir í svarinu.
Frétt mbl.is: Kaupa 69% hlut í Ölgerðinni
Það voru félögin F-13 ehf, Lind ehf. og Eignarhaldsfélagið Þorgerður ehf. sem seldu hluti sína í gær, en kaupendur voru framtakssjóðirnir Akur fjárfestingar slhf. og Horn III slhf. ásamt hópi einkafjárfesta.
Núverandi stjórnarformaður Ölgerðarinnar, Októ Einarsson, og forstjóri félagsins, Andri Þór Guðmundsson, eru ekki þátttakendur í sölunni og munu því áfram eiga stærsta einstaka hlutinn í félaginu í gegnum félag sitt, OA Eignarhaldsfélag ehf