Engar eignir fundust í búum félaganna BG Newco 5 ehf. og BG Equity 1 ehf. en gjaldþrotaskiptum í þeim lauk í byrjun þessa mánaðar. Kröfur í félögin hljóðuðu samanlagt upp á 33,57 milljarða króna en þau voru bæði dótturfélög Baugs Group og skráð í höfuðstöðvum Baugs að Túngötu 6, líkt og fjölmörg önnur félög.
Í Lögbirtingablaðinu í dag kemur fram að lýstar kröfur upp í bú BG Equity 1 ehf. hafi verið upp á 4,609 milljarða króna en félagið var stofnað árið 2001. Þá voru kröfurnar upp í BG Newco 5 ehf. alls 29,145 milljarðar en það var stofnað árið 2008.
Búin voru bæði tekin til gjaldþrotaskipta 6. júlí síðastliðinn.
Félögin slást í hóp fjölmargra dótturfélaga Baugs Group sem úrskurðuð hafa verið gjaldþrota síðustu misseri. Í maí á þessu ári var sagt frá gjaldþrotaskiptum BG Newco 6 ehf. en ekkert fékkst upp í kröfur upp á 2,5 milljónir króna. Gjaldþrotið var töluvert stærra hjá BG Holding ehf. fyrr á árinu og fékkst ekkert greitt upp í lýstar kröfur er námu rúmum 130 milljörðum króna. Meðal fjárfestinga félagsins voru matvöruverslanirnar Iceland Foods, verslunarmiðstöðvar House of Fraser og leikfangaverslanir Hamley's.
Frétt mbl.is: Ekkert greitt upp í 130 milljarða