Nú styttist svo sannarlega biðin eftir sjálfreimandi skóm Nike en þeir fara í sölu í tveimur verslunum Nike í New York frá og með 1. desember. Þeir verða þó ekki á allra færi þar sem þeir munu kosta 720 Bandaríkjadali, jafnvirði 81.720 íslenskra króna á núverandi gengi.
Fyrri frétt mbl.is: Nýir „Back to the future“ skór
Skórnir voru kynntir til sögunnar í mars en þeir hafa verið nefndir HyperAdapt 1.0. Viðskiptavinir geta pantað tíma til þess að fá að prófa skóna eða beðið í nokkrar vikur á meðan skónum er dreift í fleiri verslanir. Þó fá ákveðnir viðskiptavinir Nike tækifæri til þess að kaupa skóna í takmarkaðan tíma næsta mánudag.
HyperAdapt 1.0. eru sagðir minna á skó Marty McFly í kvikmyndinni Back to the Future en þar skartaði hann sjálfreimandi skóm, einnig frá Nike. Þeir voru aðeins framleiddir í 89 eintökum á sínum tíma og vann fólk skóna í gegnum lottó.
Nýju skórnir verða gríðarlega léttir og endurhlaðanlegir. Þegar að stigið er í skóinn, snertir hællinn skynjara í skónum sem setur sjálfvirkt kerfi í gang sem „reimar“ skóna. Hægt verður að aðlaga skóna alveg að hverjum fót fyrir sig með tveimur hnöppum á skónum.
Í sólunum verða LED ljós sem sýna stöðuna á rafhlöðu skónna en hver hleðsla á að duga í um tvær vikur.