Blönduð byggð íbúða og atvinnuhúsnæðis, vistvænar samgöngur, verslun og þjónusta verða áhersluatriði í uppbyggingu vestasta hluta Kársness. Samhliða uppbyggingu verður reist brú fyrir gangandi, hjólandi og almenningsvagna yfir Fossvog sem tengja mun svæðið við háskólasvæði Háskólans í Reykjavík, Háskóla Íslands og miðbæ Reykjavíkur.
Skipulagslýsing svæðisins og brúar yfir Fossvog er nú í kynningu hjá Kópavogsbæ, að því er segir í tilkynningu frá bænum. Gert er ráð fyrir að uppbygging svæðisins taki á bilinu 10-20 ár.
Þá segir, að útivistarmöguleikar svæðisins muni njóta sín í framtíðarskipulagi svæðisins, áhersla verði lögð á opin svæði, greiðfæra hjólastíga og gott aðgengi að strandlengjunni. Þá sé sérstaklega hugað að góðri tengingu við eldri byggð á Kársnesi sem sé eitt rótgrónasta hverfið í Kópavogi. Þegar hefur verið samþykkt skipulag tveggja reita fyrir fjölbýlishús með um 250 íbúðum og munu framkvæmdir við þær hefjast á næsta ári. Að auki er gert ráð fyrir 550 íbúðum á þróunarsvæðinu.
Jafnframt segir, að íbúðir verði um 60% af húsnæði á þróunarsvæðinu og atvinnuhúsnæði 40%. Gert sé ráð fyrir atvinnustarfsemi á jarðhæð nokkurra fjölbýlishúsa, margvíslegri atvinnustarfsemi og ferðatengdri þjónustu.
„Kársnesið er eitt mest spennandi svæði á höfuðborgarsvæðinu, það hefur allt, náttúrufegurð, uppbyggingarmöguleika og með brúnni yfir Fossvog batnar tenging hverfisins til mikilla muna,“ segir Ármann Kr. Ólafsson, bæjarstjóri Kópavogs, í tilkynningunni.
„Við leggjum mikinn metnað í gerð skipulags þróunarsvæðis á Kársnesi. Nýtum hugmyndir úr samkeppninni Spot on Kársnes sem Kársnesið var hluti af, vinnum skipulagið í tengslum við framsýna samgönguáætlun, viljum fjölbýlishús sem eru í takt við tímann og fjölbreytta atvinnustarfsemi,“ er haft eftir Theodóru S. Þorsteinsdóttur, formanni skipulagsráðs.