Síminn setur upp öflugri 4G-senda

Síminn hefur sett upp 4G-senda sem ná yfir 200 mb/s hraða. Það er um helmingi meira en eftir uppfærslu senda Símans úr 100 Mb/s í 150 fyrr á árinu og því ríflega 100% meiri hraði en var á kerfum Símans fyrir ári.

Gunnhildur Arna Gunnarsdóttir, upplýsingafulltrúi Símans, segir í tilkynningu frá Símanum að viðskiptavinir fyrirtækisins geti núna náð hraða sem ekki hefur áður sést hér á landi.

„Sérfræðingar Símans hófu prófanir með birgjunum okkar, Ericsson, í nóvember á enn öflugra 4G-neti. Þessir sendar flokkast til LTE Advanced eða LTE+/4G+ og styðja yfir 200 Mb/s. Við búumst við enn meiri 4G-hraða þegar fram í sækir og að við náum 300 mb/s á sendum okkar á næsta ári,“ segir Gunnhildur Arna.

4G-stöðvar Símans eru nú yfir 200 um allt land og útbreiðslan nær til 95,5% landsmanna. Þrjú ár voru nú í nóvember frá því að fyrstu 4G-stöðvar Símans voru settar upp. Núna fyrir mánaðamótin bættust fjórar nýjar 4G-stöðvar við og var ein þeirra sú tvö hundruðasta í röðinni. Sú stöð stendur við Ásvelli í Hafnarfirði.

Nýjar stöðvar utan þéttbýlasta svæðisins eru á Kjalarnesi og Mosfellsdal. Þá standar nýjar langdrægar 4G-stöðvar á fjöllum víða um land; Borgarhafnarfjalli, Gunnólfsvíkurfjalli og Þorbirni. „Drægni þeirra getur verið allt að 100 kílómetrar sem nýtist sjómönnum við landið vel,“ segir Gunnhildur Arna.

• Blogga um frétt