Gengið hefur verið kaupum Eikar fasteignafélags hf. á Slippnum fasteignafélagi ehf. Kaupsamningur var undirritaður í dag en hann er háður samþykki Samkeppniseftirlitsins. Samkvæmt tilkynningu frá Eik er gert ráð fyrir því að afhending muni fara fram á fyrsta ársfjórðungi þessa árs.
Kauptilboð Eikar um kaup á öllu útgefnu hlutafé Slippsins fasteignafélags var undirritað 18. nóvember. Í tilkynningu þá kom fram að heildarvirði kaupanna væri 4.450 milljónir króna. Fasteignir í eigu Slippsins fasteignafélags eru Mýrargata 2-8, Mýrargata 12 og Mýrargata 14-16, sem hýsa Icelandair Hótel Reykjavík Marina.
Eignirnar eru samtals 6.504 fermetrar og Flugleiðahótel er leigutaki allra fermetrana og eru með langtímaleigusamning.
„Vænt ávöxtun fjárfestingarinnar fyrir árið 2017 er tæplega 6,7% miðað við núverandi forsendur um tekjur og gjöld. Við kaupin munu hóteleignir verða 13% af virði fasteigna Eikar og verða 99% af þeim eignum staðsettar í miðbæ Reykjavíkur,“ sagði í tilkynningu Eikar í nóvember.