Félagið Restaurant Brands sem á m.a. skyndibitakeðjuna Burger King hefur keypt keðjuna Popeyes Louisiana Kitchen á 1,8 milljarða Bandaríkjadala eða tæpa 200 milljarða íslenskra króna. Greitt var fyrir kaupin í reiðufé.
Popeyes var stofnað fyrir 45 árum í New Orleans og í dag eru staðirnir rúmlega 2.600 talsins, flestir í Bandaríkjunum. Meðal aðdáenda keðjunnar er söngkonan Beyoncé.
Restaurant Brands rekur rúmlega 20.000 veitingastaði í meira en 100 löndum. Félagið varð til árið 2014 þegar Burger King og fleiri fjárfestar keyptu kaffi- og kleinuhringjakeðjuna Tim Hortons fyrir 11 milljarða Bandaríkjadala.