Bandaríski milljarðamæringurinn Warren Buffett hefur hvatt bandaríska fjárfesta til að halda ótrauðir áfram við að að skapa mikinn auð.
Fjárfestirinn sagði í árlegu bréfi sínu til hluthafa í fyrirtæki hans að bandarísk hlutabréf verði „nánast örugglega mun meira virði á komandi árum,“ að því er BBC greindi frá.
Hann minntist ekkert á Donald Trump Bandaríkjaforseta en hrósaði þó „bylgju hæfileikaríkra og metnaðarfullra innflytjenda“ sem hefðu hjálpað bandarískum efnahag að blómstra.
Buffett, sem studdi Hillary Clinton í forsetakosningunum í fyrra, ræddi heldur ekkert um stefnumál Trumps.
Samkvæmt bréfinu lítur Buffett bjartsýnum augum á bandarískan efnahag og bætti hann við að „börn sem eru fædd í Bandaríkjunum í dag eru heppnasti hópurinn í sögunni“.
Hlutabréf í fyrirtæki Buffetts, Berkshire Hathaway, sem á hlutabréf í Apple, Coca-Cola og fjórum stærstu bandarísku flugfélögunum, hafa hækkað um 15% að undanförnu.