Vilja pundið frekar en evruna

AFP

Seðlabankar eru í vaxandi mæli að losa sig við evrur og kaupa bresk pund í staðinn. Þetta kemur fram í frétt breska viðskiptablaðsins Financial Times. Ástæðan er sögð vera pólitískur óstöðugleiki innan Evrópusambandsins, lítill hagvöxtur á evrusvæðinu og vaxtastefna Evrópska seðlabankans. Þess í stað líta þeir á pundið sem stöðugan valkost til langs tíma segir í fréttinni.

Vísað er í könnun sem bendi til þess að seðlabankar um allan heim líti á Bretland sem öruggari höfn fyrir gjaldeyrisforða sína en evrusvæðið þrátt fyrir að bresk stjórnvöld hafi á dögunum formlega tilkynnt um úrsögn landsins úr Evrópusambandinu.

Könnunin, var birt í byrjun vikunnar og framkvæmd af útgáfufyrirtækinu Central Banking Publications og breska bankanum HSBC, náði til framkvæmdastjóra gjaldeyrismála hjá 80 seðlabönkum. Þar kemur fram að skortur á stöðugleika á evrusvæðinu væri að þeirra mati helsta áhyggjuefni í efnahagsmálum heimsins á þessu ári.

Sumir seðlabankar losað sig alfarið við evrur

Fram kemur í niðurstöðum könnunarinnar að sumir af þátttakendur hafi losað sig alfarið við evrur úr gjaldeyrisforða sínum á meðan aðrir höfðu fært fjárfestingar sínar í evrum niður í algert lágmark.

Seðlabankar í þróunarríkjum og nýmarkaðsríkjum, sem eru á meðal þeirra sem eiga mestan gjaldeyrisforða, voru líklegri en seðlabankar í þróuðum ríkjum til þess að hafa snúið baki við evrunni segir ennfremur í fréttinni.

Sú ákvörðun Bretlands að segja skilið við Evrópusambandið hefur ekki dregið úr vinsældum pundsins sem fjárfestingagjaldmiðils enn sem komið er en 71% svarenda sögðu úrsögnina úr sambandinu ekki hafa varpað skugga á pundið til lengri tíma.

Kjör Trumps ekki haft áhrif á afstöðu til dollarans

Engu að síður myndu þeir fara varlegar í fjárfestingar í pundum til skamms tíma. Könnunin leiðir hins vegar í ljós að margir svarenda telja að úrsögn Bretlands úr Evrópusambandinu muni skapa ný tækifæri til þess að dreifa fjárfestingum þeirra frekar í framtíðinni.

Tæplega 80% svarenda sögðu kjör Donalds Trump sem forseta Bandaríkjanna ekki hafa haft áhrif á heildarafstöðu þeirra til dollarans. 

Rúmlega þriðjungur sögðust áhyggjur sínar af evrusvæðinu væru tilkomnar vegna pólitísks óstöðugleika innan Evrópusambandsins þar sem stjórnmálaflokkar andvígir sambandinu hafa náð góðum árangri í kosningum á undanförnum árum.

Vaxtastefna Evrópska seðlabankans var einnig nefnd til sögunnar en stýrivestir bankans hafa í raun verið neikvæðir frá árinu 2014 í þeim tilgangi að reyna að auka hagvöxt innan evrusvæðisins. 

mbl.is

Bloggað um fréttina

Svæði

Gagnaveitur

Erlendar viðskiptafréttir