Bragi Hinrik Magnússon og Þór Bæring Ólafsson sem reka ferðaskrifstofuna Gaman ferðir munu opna hótel í Bæjarhrauni 4 í Hafnarfirði í næsta mánuði og er undirbúningur vel á veg kominn.
Á Hótel Hellisgerði verða 38 herbergi af ýmsum stærðum og gerðum en öll herbergin eru með baðherbergi og eldhúsi.
„Mikil þörf er á auknu gistirými hér á Íslandi þar sem ferðamönnum fjölgar ört og því ljóst að þetta er kærkomin viðbót fyrir ferðaþjónusta á höfuðborgarsvæðinu,“ segir í fréttatilkynningu.
„Við vildum tengja nafnið á hótelinu við Hafnarfjörð og því varð Hótel Hellisgerði fyrir valinu,“ er haft eftir Braga en Hellisgerði er almenningsgarður í Hafnarfirði sem er þekktur fyrir miklar hraunmyndanir sem gefa honum óvenjulegt yfirbragð.
Í tilkynningunni er bent á að það taki ekki nema 25 mínútur að keyra frá flugvellinum í Keflavík á hótelið og svo er miðbær Reykjavíkur í tæplega 10 km fjarlægð. Strætósamgöngur frá hótelinu eru mjög góðar og því mjög auðvelt að komast á milli staða.
Að sögn Braga sjá menn sömuleiðis tækifæri í að byggja upp meiri ferðamennsku í Hafnarfirði. „Hér í Hafnarfirði og á svæðinu í kring eru miklir möguleikar þessu tengdir og þetta verkefni gæti verið eitt skref í þá átt að auka fjölbreytni í atvinnulífinu hér“.
Hótel Hellisgerði verður opnað 15. maí og er þegar byrjað að taka á móti bókunum á vefsíðu hótelsins. Til viðbótar við hótelreksturinn er ætlunin að bjóða upp á einhverja afþreyingarkosti og er verið að skoða ýmsar hugmyndir í því sambandi.